Opere

U tìtulu sceltu da Salvadò Scotto dici assai di a indiatura propia, da veru singulari. Andendu Videndu, v'eccu da avìassi senza travvià : Vocu è vedu.

Ed hè saputa chì u pastori viaghja cù a so greghja è abbada par istrada. È si campa à pian di parasgiu cù i so bestii chì stràppani quiddu filu d'arba in a riccia, quidda punta di vetta chì pendi da a sarrenda.

È, vinutu u mireghju, i bestii pàscini, rumièghjani stesi, mentri u pastori tessi u filu brùghjulu di l'immàghjinazioni.

Cumparìscini tandu l'immàghjini, u versu, i rimi, à bedda sciucchetta. Vènini cume una stola di tanti fidiati ammintati. Culà un vechju casteddu, una ghjesgia cù u so campanili pinzutu, u forru dundi i donni dirrùdani da infurrà i vasteddi, a pila di fenu dundi dormi u senza casa, a fonti d'acqua fresca è linda, i ciucci chì còrrini à zò zò.

Quiddi rimori lebii o chì rintrònani, chì chjàmani i ricordi d'una volta d'una machja fitta in flòrisi. Salvadò l'hà stati à senta ed hè statu à senta da i musi.

A puisìa hè cantu, ànima, pinseri. Di a natura, a terra, u celi, l'acqua, a vita d'ogni ghjornu cù a so ghjenti, l'amichi muntanendu è impiaghjendu.

U versu hè u beddu, hè u spichju veru di u pueta chì scegli frà tanti ricchezzi dàtuli da l'antica cultura, cù u nuvimu di u tempu chì cammina.

Và da veda vedi dund'andà. È cantà à mezu à l'altri, amicu ci sè tù è ci sò anch'eiu. A dici a puisìa, a canta Salvadò.

Cusì chì, lighjendu'ssi paghjelli, o megliu ancu, cantènduli à voci rivolta, spezza l'aligrìa cù l'amicizia spartuta.